گوی آتلی گوی عمامه لی دئییمی و حکایه سی --ائلچی بی دن

گوی آتلی گوی عمامه لی دئییمی و حکایه سی قاباق کی یازیلاریمداآز(آبی آسمانی)رنگی حاققیندا بیلگی لر وئررک تانریچیلیق اینانجیندا مقدس اولدوغونا آیدینلیق گتیرمیشدیم؛تانریچیلیق اینانجینی یاشادان خالقلار گونده لیک دان-ین یاریلماپراسئسی نی یئنی حیات باشلانیشی کیمین قبول ائله ییردیرلر؛تانریچیلیق اینانجینی تمثیل و تبلیق ائله ینلر دوشونوردولر کی بیرسوتکا(24ساهات)گئجه و گون اوز تکرار اولوناراق جانیلار او جمله دن انسانلارین عومرونه داها رنگ قاتمالی اولور؛تاریخاَ گوی رنگ آنلامیندا آز و اؤز دئییملرینی قافقاز و خزر حوزه سینده یاشایان کوکسل دیللی(التصاقی)خالقلار گونده لیک سحر آچیلیشینا دئدیکده اونو مقدس بیلمیشدیرلر؛اوخاری بولوملرده ایضاح وئردیم کی تانریچیلیق اینانجی اوزوندن سونرا یاریلاسی اینانجلارینان چارپازلاشدیقجا اورتاق بیر اینانجین یارانماسینا گتیریب چیخارتمالی اولور؛یهود وخاچ پرست لیک(مسیحیت)اینانجلاری کیمین اسلام اینانجیندا تانریچیلیق اینانج تاثیری آلیتیندا یارادیلاراق دونیا خالقلارینین تاریخینی اوجمله دن شرق و یاخین شرق تاریخینی آلت اوست ائله میشدیر؛اسلام اینانجی یارادیلیب یایلما تاریخینی ایکی یئره بولمک اولار؛بیرینجیسی یارادیلمامیشدان اونجه تاریخاَ عربستان یاریم آداسیندا باش وئرن سیاسی اجتماعی اولایلار تاثیری آلتیندا باش توتاراق عرب طایفالارینین دیل و مدنیتی اوزره قورولمالی اولموشدور؛اسلام اینانجینین یالاواجی(پیغبر)آدی گئدن اینانجی عرب دیل و کئچمیش تاریخی اوزرینده قوردوغوندان عرب خالقی نین دونیا باخیشلارینا اویقون بیر اینانج طرزینی یاراتمالی اولور؛اسلام اینانجی بو دونه اسلامی حوکمت آدینان دورد خلیفه واموی لر دورونه قدرگلیب چیخاراق اونلار قیلینج گوجونه بایراق آلتینا گتیردیکلری عرب و غیر عرب خالقلاری اداره ائله مه لی اولموشدورلار؛اسلام خلافتی عباسی خلیفه لرینه کئچه رک گئد گئده تورک خالقلاری وسرکرده لری آدی گئدن اینانجی قبول ائله مه گینن اسلام بایراغی آلتینا گیریب آدی گئدن اینانجی مودافیعه ائله مه گه باشلاییرلار؛تورک خالقلاری و سرکرده لری اسلام اینانجینی قبول ائله ییب یایدیقجا اوز دیل و مدنیتلرینی آدی گئدن اینانجا داخیل ائله ییرلر؛گونوموزه گلیب چاتان اسلام اینانجی ایکی یؤنلو بیر اینانج اولاراق بیریسی محمد حضرتلرینین عرب دیل مدنیتی اوزره قورودوغو اینانج طرزی اولدوقدا ایکینجیسی اونجه دن موسلمانلاشمیش تورک خالقی و سرکرده لرینین دونیا باخیش و مدنیتلری چارپازلاشاراق گئد گئده اورتاق بیر اینانج طرزی یارانما اولور؛میثالیچین اسلامیتدن اونجه عربستان یاریم آداسیندا یاشایان توپلوملارین مدنیتینده اولو قویولوب و اولنلرین مزاری اوسته آبیده دوزلتمک دب توره سی اولمامیشدیر؛اسلام دونیاسیندا بیرینجی دونه اولن لرین مزاری اوسته آبیده دوزلتمک مسله سی تاریخاَ تورک آدلاندیردیقلاری خالقلارین قورقان یاپما مدنیتی اوزره باش توتمالی اولموشدور؛عربلرده مین دورد یوز ایل اونجه دن محمد حضرتلرینین او جمله دن اونون توره لرینین توربه سی اوسته یاشیل بویا و پارچا چکیلمک مسله سیده تاریخاَ تانریچیلیق اینانجینی یاشادان کوکسل دیللی خالقلاردان آلینما دب توره اولموشدور؛اسلامیتین یاراندیغی دورودن محمد حضرتلرینین گتیردیگی قرانا و اونونلا باغلی گلن روایت لره اینانانلارا اهل سنّت دئییه آلاندیرمالی اولورلار؛اهل سنّت مرامینی قبول ائله میش عربستان یاریم آداسیندان توتموش میصیر- مراکش و الجزایر اولکه لرینه قدر یاشامالی اولورلار؛اهل سنّت دئییلن خالقلاردا امام اولیا توربه لری اوستونده آبیده یاپماق گرکلی سایلمادان اومسله نی اسلام اینانجینا ضید اولدوغونا اینانیرلار؛اونلار اینانیرلار کی اسلام اینانجیندا یالاواجدان(پیغبر)توتموش امام اولیالار قدر منم لیک ائله مه دن یاشادیقلاری عُمری الله ها و اوزل لیکله الله هین مومن بنده لرینه حصر ائله دیکلرینه گوره اونلارین توربه سی اوستونده آبیده یاپماغیدا اونلارین عقیده لرینه ضید اولدوغونو دوشونرلر؛بو روایتین باشلیجا دلیلی عرب مدنیتینده اولن کیمسه لرین توربه سی اوستونده آبیده دوزلتمه دب توره نین اولمادیغی دایانیر؛زامان گئدیشاتیندا تورک سرکرده لری اسلام دونیاسینا حکومت ائله دیکده آتابابالاریندان ایرث آپاردیقلاری تانریچیلیغینان باغلی دوشونجه لرینی اسلام قایدا قانونلارینان بیرلشدیررک یئنی اسلامیت فورماسی یاراتمالی اولورلار؛ایلکن اسلام دونیاسینا داخیل اولوب اهل سنّت دب توره سینی قبول ائله یین تورک خالقلاری اوز کئچمیش آتابابالارینین قورقان یاپماق عنعنه لرینه صادیق قالاراق اولن اولیا وبیلگن لرین توربه لری اوسته آبیده دوزلتمه نی یئنی دن باشلامالی اولورلار؛اولن کیمسه نین توربه سی اوسته گونبذ دوزلتمک اهل سنّت آراسیندا منع اولونماغینا باخمایاراق اقتدارلی تورک سرکرده لری بو ایشی اهل سنّت عالملرینین بویونلرینا قویاراق گونبذ یاپماقدان علاوه کئچمیش تورک خالقی نین مورفولوگییاسیندا اولدوغو کیمین عومور آغاجی مسله سینی گونده مه گتیرمه گینن یئنی قوردوقلاری اسلام قایدا قانونلارینا علاوه ائله ییرلر؛اسلام دَیَرلرینه علاوه اولونان عومرو آغاجی بو دونه دیلک آغاجی(پیر آغاجی)جیندیرری پیر)آدلاناراق کند کویشن آرا بیتن بعضی آغاجلارا اسگی پارا باغلاماغینان شامانچیلیغینان اسلامیتی بیرلشدیرمه لی اولورلار؛زامان گئدیشاتیندا اهل سنّت اینانجینی قبول ائله میش عثمانلی تورکلریندن فرقیله نن اون ایکی ایماملیق اینانجینی قبول ائله یین کوکسل دیللی خالقلار او جمله دن قیزیل باش حرکاتینی یارادان توپلوملار آراسیندا اولن اولیا و بیلگن لرین توربه سی اوسته آبیده یاپماق مسله سی اینانج ماهیتی تاپیر؛بو مسله اؤن ایکی اماملیق شیعه لرینن اهل سنّت آراسیندا یارادیلان کشمه کئشدیر کی تاریخاَ تورک خالقی و سرکرده لرینین ایش اوستونه گلدیکلری یوز ایل لیکلره تصادف ائله ییر؛مین ایل کئچه رکده تورک خالقی وسرکرده لری اسلام دونیاسینا باشجیلیق ائله ییرک دورد چرشنبه واوزل لیک له نوروز بایرامی مسله سینی اسلام اینانجینان توتوشدوروب باریشدیرماغا جهد گوزترمیشدیرلر؛اسلامیتده اهل سنّت مرامی عربستان یاریم آداسیندا باش توتدوقجا اسلام اینانجینین بیر شویبه سی سایلان اون ایکی ایماملیق(شیعه)مرامینین یارانیب فورما تاپماسیندا تورک سویلو شاهلارین حل روللاری اولموشدور؛اؤن ایکی ایماملیق مرامینین تملی دورد خلیفه او جمله دن عُمرحضرتلرینین زامانیندا باشلانسادا سونراسی ایش اوستونه گلن اموی و اوزل لیک عباسی خلیفه لری شیعه چیلیک مرامینا اینانیب تبلیق ائله ینلری دیندن خارج(رافیضی)تانیدیقدا سرکوب ائله مه لی اولوردورلار؛مانقوللارین ایش اوسته گله رک عباسی خلیفه لرینین حوکومتینه سون قویمالی اولورلار؛ائلخانلی سرکرده لری گونش پرست اولدوقدا شامانچیلیق آدی آلتیندا اوز اینانجلارینی شیعه چیلیک اینانجینان باریشدیراراق یئنی اینانج فورماسی یاراتمالی اولورلار؛میثالیچین امام و امامزادالارین توربه سی اوسته گونبذ یاپماق دب توره سی سرعتله داوام ائله مه لی اولور؛ائلخانلی لار دورونده شامانین بئلیندن گوی شالینی آچاراق علی حضرتلرینین توره سی سایلان سئیدلرین بئلینه یاخود بویونلارینا باغلامالی اولورلار؛شاه ختایی دونیمینده مچید و حسنیه لره گتیریلن علم لرین باشینا قویولان گؤورچین و اژدها اونقونلاری تانریچیلیق اینانجینی یاشادیب تبلیق ائله یین ائلخانلی سرکرده لرینین دولتی اونقونلاری اولموشدورلار؛کربلا شهیدلرینه حصر اولونان اؤن گونلوک محرم یاس توره نی کئچمیش تورک و مانقول خالقلارینین دب توره لریندن اولاراق شیعه چیلیک اینانجینا علاوه اولونموشدور؛تاریخدا بو نوع یاس توره نی توتماق نه عرب ده نه ده هند سویلو خالقلاردا اولمامیشدیر؛بیز آلپ ارتونقانین اولومو حاققیندا دئییلن آغیلارا(مرثیه)باخاندا عین کربالا شهیدلری حاققیندا دئییلن مرثیه نوعونون اولدوغونو گورمه لی اولوروق؛مین ایل کئچه رکده شیعه چیلیک مسله سی اسلام دونیاسیندا اِن کئشمه کئشلی چاخناشمالاردان بیریسی اولاراق مانقول و تورک سویلو شاهلاری او جمله دن نادیر شاه اونو اسلام دونیاسینین مجتهدلری سایلان اهل سنّتین بوینونا قویاراق گونده مه گتیرمه لی اولموشدورلار؛تانریچیلیق اینانجیندا خیضیر حضرتلرینه وئریلن آد شیعه چیلیک اینانجیندا (گوی آتلی و گوی عمامه)دئییمی کیمین گوزترمه لی اولور؛دده قورقوت حکایه لرینده گوی آتلی گوی دونلو خیضیر کیمین عکس اولونان شخصیت بورادا آد عوضله ائله ییرک شیعه چیلیک اینانجینا علاوه اولونور؛بئش یوز ایل کئچه رکده شیعه چیلیک اینانجینی قبول ائله میش تورک آنالاری بو دونه گوی آتلی و گوی عمامه دئدیکده ایلکن علی حضرتلرینی ایکینجیسی امام حسین حضرتلرینی و نهایت ابوالفضل حضرتلرینی نظرده توتمالی اولورلار؛بعضی نادیر حاللاردا اون ایکینجی امام مهدی حضرتلرینه ده دئمه لی اولورلار؛گوی آتلی گوی عمامه لی مسله سی بعضی حکایه لرده آغ آتلی اوغلان و کیشی کیمینده اوزونو گوزترمه لی اولور؛ حورمتله ائلچی بی انزلی لیمانی 12/12/1403