&وجی کیمدیر

&ایکینجی دونیا قارشی دورمالاری

&وجی نین کوچگونلوک گونلری

&وجی و عایله نین معشیت چتینلیک لری

&مکتب گئتمک آرزیسی

&وجی عسکرلیک ده اوچ صینیفه درس اوخویور

&وجی حزب توده مئیللی اولور

&وجی انزلی شهرینده شیلات اداره سینده ایشه دوشور

&وجی گنج یاشلاریندا آبکنارلی بیرقیزا اورک باغلاییر؛

&وجی گنج یاشلاریندان شعیر یازیر

&وجی نین شعیر دیلی

&وجی ساواک کشفیات اداره سی ورین نن هده له نیر

&وجی ایرانشهره سورگون اولونور؛

&وجی ایکینجی دونه عایله قورور؛

&وجی گسترش اداره سینده ایشه دوشور

&وجی زیندانا دوشور

&وجی نین ال یازیلاری یاندیریلیر

&وجی سکگیز ایل زینداندا قالیر

&وجی تقاعوده چیخاراق تهراندا یاشاییر

&وجی اوشاقلارینی آناسینی الدن وئریر

&وجی سونونجو اولاراق ائولنمک قرارینا گلیر

&1373جو ایللرده وجی نین غزللری آدلی ایلک شعیرکتابی

&وجی سون واختلار انزلی کوچور

&ساحیل گورسه نیرآدلی ایکینجی شعیر کتابی

&وجی سون واختلار خسته نرک دونیاسینی دَیشیر

& وجی انزلی قبرستانیندا توپراغا تاپشیریلیر

&وجی نین چاپ اولونمامیش شعیرلرینین سون دورومو

گاهدان وجی شخصییتی یادیما دوشه رک اوزومو قیناییرام کی ندن اوستادین حاققیندا یازیلاریم آز اولوب بیله سیندن آلدیقلاریمی اوده یه بیلمه ییرم ؛من بیر مطبعه چی اولاراق ایللردیرکی یازی پوزو ایشی نن مشقول اولاراق ندن اوستادین اولوب قالان اثرلرینی چیخارتماییرام ؛اوزوم اوزومو قیناماغیمنان علاوه گاهدان وجی پرستش کارلارینین دا قیناغینا معروض قالیرام؛وجی آز تانینمیش سوز اوستادلاریمیزدان اولاراق یئنی نسیل بو داهی شخصییتی آرتیق تانیماق ایسته ییر؛موسی اوغلو وجه اله رمضانی 1311جی گونش ایلی خالخال سنجبد بولگه سی دئییه کویو(کیوی)شهرجیگینده دوغولموشدور؛موسی کیشی اوز باجاریغینا گوره چرچیلیک ایشلرینن مشقول اولورموش؛ایکینجی دونیالیق قارشی دورمالاری تاثیر آلتیندا آراز و آستارانین بوتاییدا روسلارین الینه کئچندن سونرا خالقیمیز عذاب اذییتلرینن اوزله شرک موسی کیشی ده اوز پول پاراسینی ایتیرمه لی اولور؛؛پول پاراسینی ایتیرن عایله باشجیسی سونرالار گیلان انزلی شهرینه کوچمک مجبوریتینده قالیر؛آز یاشلی وجه اله عایله سیله بیرگه انزلی شهرینه کوچه رک دایی سینین یئمک خاناسیندا ایشلَمه لی اولور؛عایله نین معشیت چتینلیکلرینه گوره آز یاشلی وجه اله درس اوخوماقدان گئری قالاراق مکتب یازی پوزو حسرتی اوره گینده قالیر ؛1320 و اوتوزونجو ایللرآراسی حادیثه لره رغمن وجی شخصییتنده ده دَیشلیک لر عمله گلمه لی اولور؛وجی عسکرلیک چاغلاریندا آزاراق درس اوخویوب اوز روحو چاخناشمالارینا درمان آختارمالی اولور؛گنج یاشلاریندان حزب توده مئیللی اولان وجی آدی گئدن سیاسی قوروما داخیل اولاراق فعال عضولریندن اولور؛وجی نین اوچ کلاس ساوادی اولماغینا باخمایاراق بوش واختلارینی کتاب اوخوماغینان کئچیرتمه لی اولور؛آزاد موطالیعه ائلمک لر وجی روحوندا آیلیش یاراداراق اونو یاشید تایلارینان فیرقیلندیرمه لی اولور؛هر کیمسه یه ایش پئشه لازیم اولان کیمین وجی ده انزلی شیلات اداره سینه دوشه رک آبهای ممنوعه (یاساق قویولموش سولار) دئییلن بولومون باش رئیسی اولور؛ایلکن ائولنمک فیکیرینه دوشن وجی آبکنارلی بیر قیزین نان تانیش اولاراق گیزلیجه ارتباط قورمالی اولورلار؛زامان گئدیشاتیندا باخدی دونموش قیز وجی دن اوشاغا قالیب یول یولاجاق آختاراراق قارنیندا اولان اوشاق وجه اله آدلی گنج اوغلانا عاید اولدوغونو آتا و آناسینا دئمه لی اولور؛سونرالار ایشلری محکمه یه دوشه رک وجی نین داییسی اوزونو باجیسی اولاراق وجی نین آناسینا توتوب دئییر سن عدلیه حکمی له ائوینه گلین آپارماغا راضیلیق وئرسنده من راضیلیق وئرمه بیلمه رم؛ وجی سونرالار اوشاقلارینین آناسی دئییه نجیبه آدلی خانیمنان حیات قورسایدیقدا یاری یولدا قویدوغو ایلکن سئوگیسینی یادیندان چیخاردا بیلمه ییر؛یادیمدادیر بو حکایه نی منیم چین دانیشیب گوزلری دولاندا علاوه ائله دیکی آبکنارلی قیزدان اولان اوغلوم ایسلامی انقلاب باش وئرن ایللرده موخالیف قوروملارا قوشولاراق اولدورلموشدور؛وجی گنج یاشلاریندان شعیره اوز گتیررک ایلکن یازدیغی شعیرلر دری دیلینده اولموشدور؛سونرالار یاخین دوست اولدوغو یوسف حسین زاده نین تانیش اولاراق تورکو شعیر یازماغا ماراق گوزترمه لی اولور؛1321ایل تولدولو و ملاحتلی سسه مالیک اولان یوسف واخت آشیری باکی رادیو دالغالارینی دینله ییرک موقام اوخوماغا مئیل گوزترمه لی اولور؛یوسف حسین زاده انزلی اجتماعیتینده شاعیرلیگیندن علاوه خوش سس ایله تانیناراق وجی نیده اوزویله یول بیر ائله ییب آرا سیرا دوستونون یئنی یازدیغی شعیرلرینی اوخومالی اولور؛وجی کئچمیشده فارسجا شعیرلرینی خروس بی محل و مست آذرستانی آدیلا یازاراق بو دونه دوستو یوسفین گوزتریشله تورکو شعیرلر یازیب وجی آدینان اوز تامغاسینی وورمالی اولور؛وجی آذربایجان تورک ادبیاتینی اوخویاراق فیضولی –نسیمی - سئید عظیم و علی آقا واحید کیمین نهنگ شاعیرلردن اورنک گوتورمه لی اولور؛آذربایجاندا1325 جی ایل حادثه لرینین جانلی تانیغی اولان وجی پهلوی حاکمتینه قارشی چیخاراق وار گوجویینن منسوب اولدوغو خالقین هارای هارایینا چاتماق ایسته ییر؛قلم گوجوایله عصیان قالدیران وجی بو دونه شعیرینن مئیدانا گیریب ظلمه معروض قالمیش قارا خالقین حاققینی طلب ائله مه گه باشلاییر؛اوستاد وجی نین یارادیجی عالمینه باخاندا مشروطه شاعیرلری آدلانان فرخی یزدی و میرزاده عشقی آذربایجانین تانینمیش سیمالاریندان میرزه علی اکبر صابیرو شبسترلی موجوز کیمین عصیان قالدیراراق قددار حکومت قارسینداسینه گرمه لی اولور؛وجی فضولی دن سئید عظیم دن بهره لنسه ده اونلارین یازیقلاری شعر اسلوبونو ساده لشدیرمه لی اولور؛وجی نین شعیر دیلی قارا خالقین دیلینه یاخین اولدوقدا فولکورلیک حال هاواسی تاپیب ساوادلی و ساواسیزلار وریندن قارشیلانمالی اولور؛وجی واقدیکان فضولی وسئید عظیمین گتیردیکلری دولقون عباره لری خیردالایاراق آذربایجان غزلینده یئنی بیر حال هاوایاراتمالی اولور؛اوستاد وجی کئچمیش غزل یازار فیضولی و نسیمی و سئید عظیم کیمین عرب و فارس سوزجوکلرینی آرتیقراق شعیرلرینده ایشلتدسه ده گاهدان چیلخا آنادیلی تئرمینلری گتیرمه گینن اوز شعیرلرینه داد دوز قاتمالی اولور؛اورنک اولاراق بو سیریقدا گلن یئلکان و دالغا سوزلرینی کی دئییر

یئلکانی بوشلاییب گمی چی اولدوز آختاریر

کئشگه بیلئیدی دالغا دالیندا گوداردا وار

یاخود آیری بیر شعیرینده چول سوزونو گتیررک دئییر

شاعرم موجوزه آختارما منیم شعیریمدن

هر جولون ترسه گئیین خواجه شیراز اولماز

گوردوگونوز کیمین دوغما تئرمینلری شعیرینه قاتاندا داها گوزل لیک یاراتمالی اولور؛وجی حزب توده نین فعال ایشتراکچیسی اولاراق او قورومون مرامنامه سی گوزوایله اولکه داخیلی و دونیادا گئدن اولایلارا باخمالی اولوردو؛وجی اوز شعیرلرینده اولکه داخیلی پهلوی رژیمینی تنقید آلتینا آلاراق دونیالیق یئنی نیظام دئییه کاپیتالیسیمه قارشی چیخمالی اولوردو؛بو سیریغی دینله یین لوطفا باغلاییب ششدری و هفت خانیمیزی ایلک حریف هانی مئیدان قوچوسو قانلی قماردیر بو قمار ؛وجی شیرازلی حافیظ دن فرقیلی دوشونرک مصلحتی ایش گورمه دن دوشمن لرینن مدارا یوخ موطلق قارشی دورمانین طرفداری اولاراق دئییردی؛

ترحم بر پلنگ تیز دندان ......................ستم کاری بود برگوسفندان

ترجمه:ییرتیجی حیوان اولاراق قاپلانا رحم ائله مک قویونلارا ظلم ائله مک له نتیجه له نر

؛وجی نین باخیشیندا یارانمیش انسانلاربیربیرلرینن ایستی موناسیبت قورماغا محکومدورلار؛او دوشونوردوکو اجتماعیتده آیری سئچگیلیک قیسقانجیلیقدان عمله گلر؛بوگونکو انسان فلاکیتینی باشدا اوتورانلارین قیسقانج اولدوقلاریندا گوروردو؛وجی حریم ساخلایان بیر انسان اولاراق آنا چارقاتینی شرف بایراغی سانیب عایله وارلیغینا حورمتله یاناشیردی؛بو سیریغی دینله یین لوطفا

جهان خلقته هم بانی هم بنا آتادیر

حقیقت آیناسیدیرجام جهان نما آتادیر

نجات کشتیسی دیرمئهریبان وفالی آنا

هدایت ائیله یین همتلی ناخدا آتادیر

***

گداده اولسا سنین سطانین دیر ای نادان

حکیم اولا؛شاه اولا یاکی بینوا آتادیر

دوست آنلامی وجی تویشونده(خیال)اَن مقدس تئرمین اولاراق آدی گلنده سجده یه دوشمه لی اولوردو؛گاهدان حقیقی دوستو دوغما قارداشدان اوستون توتمالی اولور؛بو سیریغی دینله یین لوطفا

دوست ناموسودور بیزلره ناموس شرافت

دوست ناموسونا پیس باخانین غیرتی یوخدور

منیم چین هر ندن اونملیسی وجی نین ایلاهی و عرفانی باخیشلاریدیرکی شعیرلرینی اون نان بزه مه لی اولوردو؛مئی شرافت سویو بیلن وجی نین شعیرلرینده شراب-مئیخانا -ساقی-جام و پیالا سوزجوکلری رمزی معنا داشییاراق اونون دوغورداندا سوز اوستادی اولاراق ایچ عالمینده باش وئرن چاخناشمالاریندان خبر وئریردی؛واقدیکان یازدیغی بو نئچه سیریغی دینله یین لوطفا

بیز ادب صاحیبیک قورخما خطا باش وئرمز

مئی شرافت سویودورجرعه سی نین حکمتی وار

باده کئفلنسه اگر شیشه سین اول داغیدار

یاخشی باخ شیشه سی نین گورنه زلالییتی وار

وجی یئددیلر جرگه سینه داخیل اولان شاعیر اولاراق او کونول غبارینی سیله بیلمه گینی تکجه جام چکمک ده گوروردو؛عرفان دوشونجه لی شاعیرین خیالی آغی(آغ ایپکدن توخونموش پارچا)کیمین اولاراق او بایازلیغا بیر میلچک قوناندا ساقی سینی چاغیراراق های هارای سالمالی اولوردو؛بو سیریغی دینله لوطفا مئی شرف معجونودور زاهید سوروشما طعمینی مخلص عاشق دادمامیش بیر جرعه شیرین کام آلار وجی او حاققا چاتمیش شاعیرلردندیرکی اوزو دئمیشکن ایچ آت باشلیغینی (سرکشی)جام چکمک گوجو ایله رام ائله مه گه چالیشیردی؛وجی قلمینده بیر تؤو گئتمه حیسی واریدیرکی آدام آلدادیب و اولدورن لرینن- ماخلوغا یالان ساتیب دین نن چورک آغاجی دوزلدن نرینن- سو بولاندیریب بالیق توتانلارینان ها بئله دوست آدینان گیریب دوشمن آدیلا چیخان لارینان باریشماق ایسته میردی؛

قویمارام عاشق قناری اوچماغا حسرت چکه

قان ایچن قوزقون اگر بیر گون دوشه چنگالیمه

بیشه لر آسلانییام هر نه قوجالسامدا من وجی

باخما تولکوباغلاییبدی قوریوغون کوپالیما

من ائله دوشونورم کی وجی فارس سوزلرینی تورکه قاتیب عروض قالیبینده یازان سونونجو شاعیرلردن اولاجاقدیر؛وجی اوز آنا دیلینده شعیریازماغی ائو تاپیشیریغی بیله رک یازدیغی سیرالارین بیرینده سوز تئلینی بئله تومارلامالی اولور؛

وجی مردانه زحمت چک گتی آذر دیلین نظمه

فراموش ائیله مز ائللر سنی معیار اولان یئرده

وجی اینانمیش بیر انسان اولاراق اجتماعیتده قبول اولونموش اینانج ماهیتیلی مسله لره مثبت یاناشیردی؛اما نه دئمک اونون تاپیندیغی تانری داها اوجالاردا اولوردو؛یادیمدادیر بیر دونه دین و اینانج مسله لریندن سوز صحبت دوشه رک دیلینین ازبری اولان بو سیریغی(بیت) شعیرینی اوخویوب خیرادالاماغا باشلادی؛ آدین سوروشما ولی بیر اوصولا پابند اول

فطرتین بایدیرسا آدم دیو اولار شیطان اولار

دین آدیلا اوزونه بازار آچان اویونبازلاری تنقید آتشینه توتاراق اوز شعیرلرینده اونلارا سرت جاواب وئرمه لی اولوردو؛بو سیریغی دینله یین لوطفا

زاهدا من چکیرم بار ملامت سنه نه

کونلوم ایستیر ائلییم ساقیا منت سنه نه

سن گئت اوز فیکیرینه قال منده اوز عملیم

داور اللاه دیر اگر روز قیامت سنه نه

وجی اومانیست بیر شاعیر اولاراق فرق قویمادان آغ –قارا خالقلارینی بیرلیگه چاغیریب دینج یاشاماقلارینین طرفداریدیر؛بلکه ده آماجیندا اولان دینج یاشاماغی الده ائله مه گیچین پول پارا و گوج صاحابلارینی هده له ییرک سس ساوینی قالدیرمالی اولوردو؛بو ایکی سیریق شعیرینی دینله یین لوطفاَ

انسانلارا حورمت ائده نین قیمتی یوخدور

بی معرفتین جامعه ده حورمتی یوخدو

***

آختارما سن اوز نفعینی آشفته بازاردا

تک لذت آپارماق بشره لذتی یوخدور

حزب توده نین فعال اشتراچیلاریندان اولان وجی دفعه لر شاهین کشفیات اداره سی دئییه ساواک وریندن توتوقلانیب سوندا محاکیمه اولاراق انزلی دن سیستان بلوچستان ایالتینه باغلی اولان ایرانشهره سورگون اولونور؛بو دونه توتوقلانیب سورگون حیاتی یاشاماغا معروض قالاراق شیلاتداکی ایشینی الدن وئرمه لی اولور؛ایرانشهرده سورگون حیاتی یاشادیغی حالدا (اداره گشترش)ده ایش قبول اولونور؛ایشه دوشه بیلمه گینی سببی ده آدی گئدن شهرده حزب توده مئیللی بیر سرهنگین تانیشلیغی عرفه سینده باش توتمالی اولور؛وجی ایرانشهریده سورگون حیاتیدا یاشاسایدیدا آدی گئدن شهرده مسلک داشلارینی تاپاراق اونلارینان اونسییت قورمالی اولور؛شاه حکومتینی تنقید آتشینه توتان وجی یئنی دن توتدوقلانیب تورمه یه دوشور؛یئددی ایل لیک شاهین زیندانینی چکن وجی سونرالارتهراندا کی قیزیل حصار دئییلن ساخلانیلما یئریندن خوشا گلمز حکایه لر دانیشیردی؛او خوشا گلمز حکایه لردن بیری اوستادین واخدیکان یازدیغی شعیرلرین یاندیریلماسی اولموشدور؛اوستاد دئییردی من قیزیل حصار زیندانیندا اولارکن اوشاقلاریم آناسی واخت بئواخت یانیما گلیب بیله منن خبر توتمالی اولوردو؛بو گل گئد آراسی ساواک مامورو حیات یولداشیمی کشفیات بولمه سینه آپاراراق سورقو سوالا توتمالی اولورلار؛اوستاد آرتیریردی بو گل گئد آراسی چاراسی قادین قورخاراق چوخلو ال یازیلاریمی یاندیریر کی مامور الینه دوشمه سین؛1373جو ایل دئییه اوستادین 228 صفحه لیک وجی نین غزللری آدلی ایلک اثری چاپدان چیخاریلمالی اولور؛اونجه دن تهراندا دام دئش آلاراق اورادا یاشامالی اولورلار؛وجی تقاعوده چیخاندان سونرا او ائوده یاشایاراق هر ایکی آیدان بیر انزلی شهرینه اوز توتوردو؛حیات یولداشی نجیبه خانیمی ایتیرن نن سونرا آدی گئدن ائوی ساتیب دورد اوغلو آراسیندا پای بولوش ائله مک مجبوریتینده قالیر؛تک قالماسین دئییه سونرالار دوست تانیشین گوزتریشینن هم یئرلیسی دوکتور محمد سرورینی باجیسی گلستان خانیمنان ائوله نرک انزلی شهرینه گلمه لی اولورلار؛انزلی یه گلندن نئچه ایل سونرا ساحیل گورسه نن آدلی ایکینجی شعیر کتابی چاپدان چیخارتمیش اولور؛اوستاد وجی نین پرستش کارلاری آراسیندا غلامحسین ابراهیمی(یالنیز)اونون قایدینا قالاراق مالی معنوی یاردیمچیلاریندان اولور؛یالنیز معللیم اوزو شاعیر اولاراق وجی یارادیجی عالمی نین وورقونو اولموشدور؛اوستاد وجی انزلی شهرینه گلندن سونرا یالنیز معللیم اوز جیبینین حسابینا اوستادا گوبلئی لر توتوب باشینا قوناق قارا چاغیرماغینان اوز اوستاد شاگیردلیک بوروجونو اوده مک ایسته ییردی؛یادیمدادیر یالنیز معللیمنن وجی نین باکی سفری اوتای بوتای آذربایجاندا سسله نرک اوستادیندا اوره گینجه اولموشدور؛اوستاد وجی اولمه میشدن نئچه آی قاباق یالنیز معللیمه محضری کاغاذ وئریب اوز ال یازیلارینی اونا حواله ائله ییرک اوزوندن سونرا چاپ اولونا بیله سی اثرلرینین آمانتداری کیمین سئچمیشدیر؛من(یازار) اوستاد وجی له ایلک تانیشلیغیمیز 1373جو قایدیر؛ او ایل کی وجی نین غزللری آدلی کتابی چاپدان چیخمیشدیر؛اوستادین کتابینی سوراغلایاراق یوسف حسین زاده نین آرام دئییلن قهوه خاناسینا گئتمه لی اولدوم؛او واختلار وجی تهراندا یاشادیغینا گوره ایکی آیدان بیر انزلی شهرینه گله رک بیله سینن گوروشوموز اولوردو؛انزلی یه گلندن سونرا دئمک اولارکی گونده لیک اوستادینان گوروشوب اونسییت قورمالی اولوردوق؛من گورن وجی ده آقایانه طبیعت-دولقون باخیش-بیلگن لیک و بویوکلوک-دونیا واولکه تاریخ ادبیاتینی اوخویوب بیلمیش-میرتچیل-درویش مسلک ودونیا مالینی ال کیری بیلن اوضمان اولموشدور؛یاش باخیمنان من اوستادان آز یاشلی اولماغیما باخمایاراق بیله می یاخین دوست و سیرداشی کیمین قبول ائله میشدیر؛گاهدان سورقو سووالا توتاراق بئینیمده اولان جاوابسیز سواللاریمی بیله سیندن سوروشمالی اولوردوم؛یادیمدادیر بیر یول ماشینا میندیریب ائوینه یئتیرنده اوزومو بیله سینه توتوب سوروشانداکی سن درس اوخومادان بیر بئله بویوکلوگو و ضیالیلیغی نه یئردن قازانمیسان؛اوزونه مخصوص گولمه گینن سول الین چیگینیمه قویوب دئدی انزلی شهرینین قهوه خانالاری منیم چین دانشگاه رولو اوینامیشدیر؛سون واختلاروجی نین کیرادا یاشادیغی ائوین قاپیسی باغلانمادان گلنلرین اوزونه آچیق اولدوقدا گاهدان ائو صاحابینین اعتراضینا سبب اولوردو؛نه دئمک وجی نین خانا صاحابی بیلمه ییردی اونون اللی متیررلیک ائوینده یاشایان جولوز گئییملی انسان اوز دورونون تکرار اولونماز شخصییتی اولاراق قارانلیق گئجه میزین ایشیق دیرگی اولان تایسیز صنعتکاردیر؛سون واختلار خسته له نیب جان آغریلارینین شکایته له نرک خسته خانالیق اولوردو؛اولومونه اوچ دورد آی قالمیش بیر گون خسته خانادان چیخاریب ائوینه آپاراندا بیله سینه اورک وئرمه گیچین یانینی چیمدیکله ییب دئدیم اوزونو ازدیرمه کی سنین هئچ نه یین دئییل؛سوزو دئیین واخدا اوزومه گولسه ده ماشیندان اننده سرت باخیشلارینان اوزومه باخیب گوزلری دولا دولا دئدی من اوزموزه خردادین اون یئددیسینده اوله جه ییم؛هر حالدا ماشینی پارک ائله ییب الیندن توتاراق ائوینه یئتیرمه لی اولدوم؛خردادین اؤن یئددیسی چاتان گونلری باشیم ماشینان ائله دیگیم تصادوفا قال اولاراق قاباقجادان بیلیب سویله دیگی خردادین اون یئددیسی یوخ ایگیرمی بیرینجی گونو حیاتینی ایتیرمه لی اولور؛بئله لیک وجی عمرونون 76جی باهارینی سوناجان یاشامادان نهایت کی الیمیزدن گئده سی اولدو؛ایندیده واراوزومو قیناییرام کی ندن سون واختلار اوستادین یانیندا اولا بیلمه دیم ؛بو مقاله ده اوستادین تکجه وجی نین غزللری کتابی الیمده اولدوقدا آرتیقراق شعیرلریندن یارارلانا بیلمه دیگیم؛اومود ائدیرم کی یاخین گله جکده دوستوم یالنیز بی یین ایاق ایره لی قویماسینان اوستادین وجی نین یئنی اثرلری چاپ اولونوب بیزیم و وجی سئورلرین الینه چاتاجاقدیر؛بورادان اوخوجولاریما سوز وئریرم کی اوستاد وجی نین یئنی اثرلری چاپ اولونوب الیمه چاتسا داها احاطه لی وجی یارادیجی حاققیندا سیزلره معلومات وئرمه لی اولاجاغام؛سوندا بو ایکی سیریق شعیری اوستاد وجی دن گتیرمه گینن سیز عزیز اوخوجولاریما ساغ سالامات قالین دئییرم؛گلن پایلاشانا قدر هله لیک؛

دئدیم آزرده خیالم منه بیر یول گوزتر

دئدی من سیر سلوک اهلینه جام جم ایدیم

دئدیم اوستاد ادب نه ائله سین آزرده وجی

دئدی خاموش کی من طالب دردو غم ایدیم

حورمتله ائلچی بی

انزلیلیمانی

10/9/1403